D’Nordstadjugend a.s.b.l., besteet aus engem Jugendhaus zu Dikrich an engem Jugendhaus zu Ettelbréck, esou wéi aus dem regionale Volet, dem Jugendwunnen souwéi d‘Jugendaarbecht an den 9 Nordstadjugendgemengen. Zu dëse gehéieren déi 6 Nordstadgemengen, Bettenduerf, Colmer-Bierg, Dikrich, Ettelbréck, Ierpeldeng a Schieren, ewéi och Beefort, Feelen a Mäerzeg. Ab 2019 ass och d’Gemeng Buerschent eng vun de Nordstadjugendgemengen.

Am Kader vum „NOJU on Tour“ – Projet war vum Abrëll bis Oktober 2018 an eisen klengen Gemengen de Ludobus ënnerwee.

De Ludobus ass ee Spillmobil, den mat Gesellschaftsan Outdoorspiller souwéi Zirkus a Sportmaterial ausgestatt ass. Dëse bloe VW T3 Bus war all Dënschden a Mëttwoch an de Gemengen ënnerwee. Zesummen mat Memberen aus der pädagogescher Ekipp vun der Nordstadjugend konnten hei Jonker tëscht 11 a 26 Joer e flotten Nomëtte verbréngen.
De Ludobus war bewosst just an deene Gemengen ënnerwee, wou et kee Jugendhaus vun der Nordstadjugend gëtt. D’Iddi war nämlech, dass de Projet d’Roll vun engem mobille Treffpunkt fir Jonker iwwerhëlt. Am Kader vum Ludobus solle net nëmme Spillraim an de Jonken hirer eegener Gemeng geschaaft ginn mee och d’Kreativitéit, Participatioun souwéi eng Begeeschterung fir Beweegung gefuerdert ginn. Net zu lescht huet den „NOJU on Tour“ – Projet d’Ziel de Kontakt an d’Bezéiung zu deene Jonken opzebauen, déi eis Ekipp net duerch d’Aktivitéiten am Jugendhaus erreecht, Mam Ludobus wëlle mir souvill Jonker ewéi méiglech doriwwer informéieren, dass d’Servicer vun der Nordstadjugend do sinn fir si a ville Beräicher z’ënnerstëtzen, virun allem ausserschoulesch.

Op 48 Touren, déi de Ludobus an senger éischter Saison gemaach huet hunn am ganzen 308 Jonker deel geholl. Sécherlech ass do nach Loft no uewen, well d’Endziel vum Ludobus ass et, fir Jonker z’ënnerstezten an zesumme mat hinnen an hirer eegener Gemeng nei Iddi’en z’entwéckelen an och ëmzesetzen. All Gemeng an hir Jonker sinn anescht an hu verschidde Bedierfnisser an Iddi’en. Fir de regionale Volet ze decken huet d’Nordstadjugend zwar gréisser Projeten wéi den Jugend Jobdag, de Kachconcours, d’Teenagedream, de Fun&Run, de Sportsdag, … mee den Ludobus ass am regionalen Programm net méi ewechzedenken. Natierlech ass hei de Jonken de wichtegsten Akteur an kann a soll eegen Iddien mat erabréngen, wat d’Participatioun vun de Jonken stäerkt. Et ass immens wichteg dat déi Jonk sech an hirer Gemeng erhéiert fillen a sou léieren de néidegen Respekt ze ginn. De Projet erméiglecht ass och de Bedarf vun de Jonken an eiser Gemeng ze ermëttelen an sou de Jonken besser kënnen do ofhuelen wou hien grad steet. Dës néi Erausfuerderungen kënnen eis Team an eis oppen Jugendaarbecht enorm stäerken. Mir kënnen de Jonken besser an hirer Transitioun zur Säit stoen an d`Roll vum Bildungsassistent garantéieren.